CCCXLII.

1450, November 3. Ottmachau.

Nickel Streit und Katharina, dessen Ehefrau, stiften ein Seelgeräth im Kloster.

Anno etc. L° am dinstage noch Symonis et Jude zu Othmuchow hat der her bischoff gemacht und ausgesprachen czwusschen Nickel Streyten und Katherine seyme weibe, die iczund ken Rome czewht mit ihrer beyder guten willen und wissen, nemlich ap fraw Katherina ee abestorbe, denne Nickel Streyt, so sal her haben zu thuen und zu lossen die gudter Lichtemberg, Waltdorff und alle ander gutter farnde und unfarnde under der kirchen herschafft gelegen, wie sie benant sein, die sie haben oder habin werdin, nichtis ausgenomen; desgleichen ab Nickel Streyt ehe abestorbe, denne fraw Katherina sein weip, so sal die fraw auch sottene gutter haben zu thuen und zu lossen. Und ap Nickel Streyt ee storbe, so sal die fraw vormachen zu zelegerethe uff deme gutte Lichtenberg XX mark czinse deme closter ken Camencz und V mark ierlichcr czinse zu der kirchen ken Waltdorff, das man die kirche dovon bessern sal. Presentes: her Heinrich Czeschwicz, her Paul von Gleywicz, Wolffhart vom Reyne, Heincze Korkewicz unde Benedictus Ottendorff. Ouch hat ir die frawe gekorn zu vormunde meyster Balthasarn von Paulaw hoferichter uff Othmuchow; so haben beyde teyle globet sotten ausproch gancz zu halden und nicht dowedir zu thun noch zu wedirruffen.

Neisser Lagerbuch a. d. J. 1447-1458 im K. St.-A. (F. Neisse III. 21 F.) Fol. 18.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.